Çay biznesində ən böyük dönüş nöqtəsi brendləşmə ilə başladı. Əgər əvvəllər çay sadəcə çay idi, indi məhsul ad, loqo, paket, dad və hekayə ilə birlikdə satılır. Brend olan çay satıcıya əlavə dəyər və daha geniş auditoriya qazandırır. İnsanlar artıq hansı bölgənin çayını aldıqlarına, məhsulun təbii olub-olmadığına, necə istehsal edildiyinə diqqət edirlər.

Fermerlər bu tendensiyanı düzgün analiz edərək çay yığımından satışa qədər olan zənciri marketinq dili ilə idarə edirlər. Çayın sahədən fincana qədər keçdiyi mərhələlər sosial şəbəkələrdə paylaşılır, fotolar, videolar, paket açılışları və müştəri rəyləri satış strategiyasının bir hissəsinə çevrilir.

Brend çay həm mağazalarda, həm kafe və restoranlarda, həm də onlayn satış platformalarında öz yerini tapır. Hətta bəzi fermerlər restoran və çay evləri ilə əməkdaşlıq edib öz brend çay menyularını yaradır.

Sahibkartv.az xəbər verir ki, yaxşı brend yaradılmış çay xammal çaydan 5–10 dəfə baha sata bilir. Bu, xüsusilə kiçik fermerlər üçün böyük iqtisadi imkan deməkdir. Onlar az istehsal edib çox qazana bilir və məhsulun keyfiyyətinə tam nəzarət edirlər.

Bu trend aqro-sahibkarlıqda ciddi dəyişiklik yaradıb: indi çay istehsalçısı yalnız kənd sakini deyil, həm də biznes sahibidir.