Amerika sənayesinə dair müsbət fundamental göstəricilərin açıqlanmasından sonra dollar indeksi yenidən yüksəlməyə başlayıb. Beləliklə, EUR/USD və GBP/USD məzənnələrində də ucuzlaşma davam etməkdədir. Qızıl qiymətləri də müqavimətlə rastlaşaraq, korreksiya edib. 
Təhlillərə əsasən, avro 1.16, funt sterlinq 1.36$-a kimi ucuzlaşa bilər. Asiya sessiyasında Yeni Zelandiya Mərkəzi Bankının faiz artırmaması qərarı, qızılın yenidən bahalaşmasına səbəb olsa da korreksiyası yenidən 1777$-a kimi dərinləşə bilər. 
Bununla yanaşı, bu gün Bakı vaxtı ilə saat 10:00-da İngiltərədən inflyasiya və saat 22:00-da FED-in toplantı protokolunun yayımlanması da böyük maraqla gözlənilir. 
Kriptovalyuta birjalarında bitkoin dolların dəyər qazanması fonunda 45000$-a düşüb. Burada da korreksiya məzənnənin 44000$-ın üzərində qalması ilə kifayətlənərsə, bahalaşma dalğası yenidən sürət ala bilər. 
Məlumat Azərbaycanın İnvestAZ İnvestisiya şirkətinin analitikləri tərəfindən hazırlanıb.