İşğaldan azad olunmuş ərazilərə böyük qayıdışın təmin edilməsi, şəhər və kəndlərinin yenidən qurulması və bərpası üçün 2021-ci ilin dövlət büdcəsində 2 milyard 200 milyon manat nəzərdə tutulmuş və 2021-ci ilin 6 ayı ərzində bu vəsaitin 16,9 faizi və ya 372,1 milyon manatı istifadə olunmuşdur.
Sahibkartv.az xəbər verir ki, bu, 2021-ci ilin yanvar-iyun aylarında Azərbaycan Respublikası dövlət büdcəsinin, o cümlədən büdcə xərclərinin funksional təsnifatının pilot bölmələri üzrə proqramların icrasına dair hesabatda bildirilir.
Hesabatda qeyd edilib ki, 2021-ci il üçün dövlət büdcəsində dövlət əsaslı vəsait qoyuluşu (investisiya xərcləri) üçün nəzərdə tutulan 2 milyard 835milyon manat vəsaitin cari ilin 6 ayı ərzində 2 milyard 611,8 milyon manatı layihələr üzrə bölüşdürülmüş, 223,2 milyon manatı isə ehtiyatda (bölüşdürülməmiş) saxlanılmışdır. Bu dövrdə sifarişçi təşkilatlar tərəfindən həmin layihələr üzrə təqdim etdikləri məxaric sifarişləri ilə dövlət büdcəsində dövlət əsaslı vəsait qoyuluşu üçün nəzərdə tutulan vəsaitin cəmi 32,0 faizi və ya 907,1 milyon manatı istifadə olunmuşdur. İstifadə olunmuş vəsait bölüşdürülmüş dövlət əsaslı vəsait qoyuluşu xərclərinin 34,7 faizini təşkil etmişdir.