Azərbaycanın beş şahmat komandası bu gün klublar arasında keçirilən onlayn Avropa Kubokunda mübarizəyə qoşulacaq.  
Sahibkartv.Az xəbər verir ki, bu gün Avropa Şahmat Birliyi (ECU) Monako şahzadəsi II Albertin sponsorluğu ilə onlayn şahmat turnirinə start verəcək.
Belə ki, “Odlar Yurdu”, “Vüqar Həşimov”, “Təhsil”, “Naxçıvan” və “Gənclik” klubları Azərbaycanı təmsil edəcək. “Odlar Yurdu” E, “Vüqar Həşimov” H, “Təhsil” I, “Naxçıvan” G və “Gənclik” D qrupunda mübarizə aparacaq.
Turnirin ən reytinqli şahmatçısı “Odlar Yurdu”nun üzvü Şəhriyar Məmmədyarovdur (2 770 xal). Həmçinin fransalı Maksim Vaşye-Laqrav (Almaniyanın “Baden Baden” klubu), polşalı Yan-Kjıştof Duda (Polşanın “Poland Husars” klubu) və çexiyalı David Navara (Çexiyanın “Novı Bor” klubu) kimi məşhur şahmatçılar da mübarizə aparır.
27-28 mart tarixlərində hər qrupda 10 komanda təsnifat mərhələsində mübarizə aparacaq. Bu gün ilk dörd, sabah isə son beş turun oyunları keçiriləcək. Doqquz turdan sonra hər qrupdan iki komanda pley-offa vəsiqə qazanacaq. Martın 29-da 18 komanda hər birində altı klub olmaqla üç qrupa bölünərək mübarizə aparacaq. Burda hər qrupda ilk üç komanda finala vəsiqə qazanacaq.
30-31 martda keçiriləcək final mərhələsində bu doqquz komanda ilə bərabər, qadın klubları üzrə Avropa Kubokunun qalibi, Monakonun Monte-Karlo şəhərinin komandası “Serkl Deşek” də mübarizə aparacaq. Həmin bu 10 komanda dairəvi sistemlə mübarizə aparacaq. Çox xal yığan komanda qalib olacaq.
Qeyd edək ki, turnirin mükafat fondu 11 500 avrodur. Qalib komandaya “Monte Karlo Kuboku” və dörd min avro veriləcək. Gümüş medalçı üç min, bürünc mükafatçı isə iki min avro alacaq. 4-cü və 5-ci yerləri tutan komandalar isə müvafiq olaraq 1 500 və 1 000 avro qazanacaq.
Final qrupu üzrə hər lövhədə ən yaxşı nəticə göstərmiş şahmatçıya 400 avro əlavə mükafat veriləcək. Bundan başqa, turnirin ən yaxşı oyunu da 500 avro pul ilə mükafatlandırılacaq. Bütün iştirakçılara isə ECU-nun sertifikatları veriləcək.