Qətər vasitəçiləri Qəzza zolağında atəşkəs razılaşması üzrə danışıqlar aparmaq üçün Vaşinqtona gəliblər.

Məlumatı Axios-un müxbiri Barak Ravid mənbələrə istinadən yayıb.

Təfərrüatlarla tanış olan mənbənin sözlərinə görə, Qətər nümayəndə heyəti girovların mübadiləsi və Qəzza zolağında atəşkəs razılaşması ilə bağlı Ağ Evə danışıqlar aparmaq üçün iyulun 8-də gəlib.

Jurnalist X hesabında yazıb ki, nümayəndə heyəti üzvləri İsrailin baş naziri Binyamin Netanyahunun ABŞ prezidenti Donald Trampla görüşündən əvvəl Ağ Evin yüksək rütbəli rəsmiləri ilə bir neçə saat məsləhətləşmələr aparıblar.

Britaniyanın Sky News telekanalı isə məlumat yayıb ki, İsrail və Fələstinin HƏMAS hərəkatı Qəzza zolağında atəşkəsə yaxınlaşıb, yeganə həll olunmamış problem İsrail Müdafiə Qüvvələrinin anklavdakı statusu və mövcudluğudur.

Qeyd olunur ki, tərəflər Qəzzaya humanitar yardımın çatdırılması prosesi və HƏMAS-ın 60 günlük atəşkəs müddəti başa çatdıqdan sonra İsrailin hərbi əməliyyatları bərpa etməyəcəyinə dair Amerika zəmanəti tələbi kimi digər məsələlərdə də əhəmiyyətli fikir ayrılıqlarını həll edə biliblər. Telekanalın məlumatına görə, İsrail ordusunun tərk etdiyi bölgələrdə humanitar yardımın çatdırılması üçün nə İsrailin, nə də HƏMAS-ın nəzarət edə bilməyəcəyi üçüncü bir təşkilatdan istifadə ediləcək.

Beləliklə, İsrail tərəfindən ABŞ-ın iştirakı ilə yaradılan Qəzza Humanitar Fondu (GHF) İsrail Müdafiə Qüvvələrinin olmadığı yerlərdə fəaliyyət göstərə bilməyəcək. BMT və ya digər tanınmış humanitar təşkilatların humanitar yardımın ötürülməsi funksiyalarını öz üzərinə götürəcəyi güman edilir.