Qazax rayonunun Birinci Şıxlı kənd sakini Zahid Cəlilov adına üç şirkət açıldığını və nəticədə yarım milyondan çox vergi borcunun yarandığını iddia edir.
 Xəzər TV xəbər verir ki, Zahid Cəlilovun sözlərinə görə, 2018-ci ildə onu aldadaraq birlikdə işləmək vədi ilə adına VÖEN alınıb və üç şirkət təsis edilib.
Zahid Cəlilovla yanaşı, onun iki qardaşının da bu işə cəlb edildiyi bildirilir.

Hazırda vətəndaş iddia edir ki, onu aldadan şəxs dünyasını dəyişib. Zahid Cəlilovun adına isə üç şirkət və yarım milyondan çox vergi borcu yaranıb. O, bir neçə ildir aidiyyəti qurumlara müraciət etsə də, problemin həll olunmadığını bildirir.

Hüquqşünaslar isə bildirirlər ki, dələduzluqda ittiham olunan şəxs vəfat etdikdə belə, aldadılan şəxs dələduzluqla üzləşdiyini hüquq-mühafizə orqanlarına verdiyi izahatlarla sübuta yetirərsə, problemin hüquqi müstəvidə məhkəmə qaydasında həlli mümkündür.

İqtisadiyyat Nazirliyi yanında Dövlət Vergi Xidməti bir daha vətəndaşları ayıq olmağa, etibarnamələrin məzmunu ilə daha ətraflı tanış olmağa və şəxsi məlumatlarını üçüncü şəxslərə etibar edərkən maksimum ehtiyatlı davranmağa çağırıb.