Azərbaycanda yeni tətbiq edilən aqrar sığorta mexanizmi ilə bağlı əhalinin və iş adamlarının məlumatlandırılması məqsədilə regionlarda fermer və sahibkarlarla görüş keçirilir.
Aqrar Sığorta Fondundan Sahibkartv.Az-a verilən məlumata əsasən, görüş aprelin 2-də Tovuz, Qazax və Ağstafa rayonlarında baş tutub.
Görüşlərdə Tovuz, Qazax və Ağstafa bölgəsində geniş becərilən taxıl, kartof, üzüm bitkilərinin, eləcə də heyvanların sığortalanması şərtləri və detalları, sığorta haqları barədə ətraflı məlumat verilib. Bildirilib ki, sığorta hadisəsi zamanı lazımi prosedurlar həyata keçirildikdən və sənədlərin təqdim edilməsindən sonra yeddi gün ərzində sığorta ödənişi zərərçəkənin hesabına köçürülür.
Qarşıdakı aylarda isə həm sığortalanan məhsulların, həm də əhatə edilən risklərin siyahısının genişlənməsi nəzərdə tutulur. Belə ki, artıq bir sıra meyvə-tərəvəz bitkiləri, eləcə də xırda buynuzlu heyvanların da aqrar sığorta vasitəsilə sığortalanması barədə qanunvericiliyə dəyişikliklər hazırlanır.
Qeyd edək ki, aqrar sığorta mexanizmi vasitəsilə südlük inək və camışları (1-7 yaş), 14 növ bitki növünü (buğda, arpa, qarğıdalı, kartof, çəltik, üzüm, limon, naringi, portağal, fındıq, şəkər çuğunduru, tütün, pambıq), eləcə də balıqları sığortalamaq mümkündür.