Bu gün Aprel döyüşlərinin 5-ci ildönümünə həsr olunmuş “Zəfərdən zəfərə” tədbiri təşkil olunub.
Sahibkartv.Az xəbər verir ki, tədbir videokonfrans formatında təşkil olunub.
Tədbir “ASAN xidmət”in, Azərbaycan Gənclər Fondunun, “ASAN Könüllüləri” Təşkilatının,  “Regional İnkişaf” və ”“Zəfər” Şəhid Ailələrinə Dəstək İctimai Birliklərinin birgə təşəbbüsü ilə həyata keçirilib. 
Öncə “Zəfər” Şəhid Ailələrinə Dəstək İB-nin sədri, şəhid polkovnik-leytenant Raquf Orucovun həyat yoldaşı Sevinc Alızadə çıxış edib. Ardınca tədbirin rəsmi açılış mərasimində Dövlət Himni səsləndirilib və şəhidlərimizin xatirəsi bir dəqiqəlik sükutla yad edilib.
Şəhid polkovnik Vüqar Yusifovun həyat yoldaşı Lalə Əliyevanın çıxışından sonra Aprel döyüşlərinə həsr olunmuş, həmçinin “ASAN Könüllüləri” Təşkilatının “Əsgərə Məktub” layihəsinin beş illik fəaliyyətini əks etdirən hesabat xarakterli videoçarxlar nümayiş etdirilib.
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev tədbir iştirakçılarını Azərbaycan ordusunun 44 günlük Vətən müharibəsində qazandığı qələbə münasibəti ilə təbrik edib, eyni zamanda şanlı Aprel döyüşlərindən söz açıb. 
Azərbaycan Respublikasının ərazi bütövlüyünün müdafiəsi ilə əlaqədar yaralananların və şəhid ailələrinin təminatına dəstək fondu – “YAŞAT” Fondunun fəaliyyət istiqamətlərindən, bu günə qədər görülmüş işlərdən də söz açılıb.