Cənubi Koreyanın ən iri elektron ticarət platforması, devizi “raket sürətilə çatdırılma” olan və “Asiyanın mini Amazonu”adlandırılan Coupang şirkəti 2021-ci ilin ilk rübünün nəticələrini açıqlayıb.
Gəlirlərin 74% artaraq, 4,2 milyard dollara, aktiv müştərilərinin sayının 21% yüksələrək 16 milyona çatmasına baxmayaraq, şirkət hesabat rübünü xalis zərərlə başa vurub. Ümumi mənfəət ötən ilin müvafiq dövrü ilə müqayisədə 70% artsa da (733 milyon dollar),Coupang-ın zərəri 295 milyon dollar təşkil edib. Bu isə bir il öncəki nəticə ilə müqayisədə zərərin 180% artması deməkdir.
Xatırladaq ki, Coupang cari ilin mart ayında Nyu-York səhm birjasında debüt edərək, 3,5 milyard dollarlıq IPO-ya getmişdi.Nəticədə şirkətin bazar dəyəri 80 milyard dolları keçmiş, bu göstərici ilə Çin nəhəngi Alibaba Group-un 2014-cü ildəki IPO-sundan sonra ABŞ birjalarında xarici şirkətin ən böyük listinqi adını qazanmışdı.Bu nəticələr Coupang-ın ən böyük investorlarından olan Yaponiyanın ən iri maliyyə qurumu SoftBankın bu həftə açıqlanan 45 milyard dollarlıq xalis mənfəətində mühüm paya malik olub.
Coupang-ın xalis mənfəət əldə edə bilməməsində əsas səbəblərdən biri son bir ildə səkkizdən artıq əməkdaşının iş vaxtı zədələnməsi və ölümü səbəbindən şirkətə qarşı iri həcmli təzminat iddialarının qaldırılmasıdır. Həm işçilərə sığorta və təzminat ödəmələri, həm də məhkəmə-hüquqi xərclər nəticədə mənfəətin bu il də sıfırın altında qalmasına təkan verib. Buna baxmayaraq, şirkət 2024-cü ilə qədər bazar dəyərinin 206 milyard dollara qədər artacağına ümid edir.
Nəticələr açıqlanmazdan öncə Coupang-ın Nyu-York birjasındakı səhmləri 2,5%, əsas investorlardan SoftBank-ın səhmləri isə 7% ucuzlaşıb.