“Qışın gəlməsi ilə bütün Avropada COVİD-19-a yoluxma sayında artım oldu. Azərbaycanda da oktyabrdan koronavirusa yoluxmada sürətli artım qeydə alınıb. Amma son 10 gündə gündəlik təxminən 4000 say ilə yoluxma nisbətən stabilləşib”. 
Bunu Ümumdünya Səhiyyə Təşkilatının Səhiyyə ilə bağlı Ehtiyacların Qiymətləndirilməsi Missiyasının yekunlarına dair media brifinqdə ÜST-ün Azərbaycandakı nümayəndəsi Hande Harmancı bildirib. 
O qeyd edib ki, karantin rejiminin sərtləşməsi ilə bağlı qərar insanları qorumaq üçündür: “Hökumət hər qərarında insanların sağlamlığını və iqtisadi vəziyyəti nəzərə alır. Bütün dünyada belədir. Fransada 50 mindən çox yoluxma olduğu üçün çox sərt karantin olmuşdu. Pandemiya əvvəldən onu göstərdi ki, yoluxmanın azalması üçün bu cür qərarlardan başqa bir “silah”ımız yoxdur. Bu cür qərarlar nə qədər çox olursa, yoluxma o qədər artır. Qərardan təxminən 1 həftə keçəndən sonra yoluxmanın sayı azalmağa doğru gedir. Səhiyyə üzərindəki yükü, gərginliyi azaltmalıyıq. Normalda ölməyəcək adamlar səhiyyə üzərindəki yükə görə, evdə müalicə olunuğu və xəstəxanaya, oksigenə çata bilmədiyi üçün ölür. Bu səbəbdən yoluxma sayının azalması lazımdır”. 
H. Harmancı əlavə edib ki, qarşıdakı 3 ay çox kritikdir: “Çünki yazdan etibarən artıq peyvənd daha çox olacaq. Gənc adamlar peyvənd olunduqca yoluxma da azalacaq. Bu səbəbdən qış bitənə qədər bunlara davam etməliyik”.
ÜST Azərbaycanda beynəlxalq vaksin planı hazırlanmasına texniki dəstək verir
Hande Harmancı bildirib ki, “Yeni vaksinlərlə bağlı məsələ hələ çox yenidir. ÜST vaksinlərlə bağlı məsələni yaxından izləyir. ÜST vaksinlərin bir araya gətirib alınması və istifadəsi ilə bağlı tövsiyələrini yaxın vaxtlarda açıqlayacaq”. 
Onun sözlərinə görə, ÜST indiyə qədər vaksinlərlə bağlı məsələlərdən razıdır: “İndiyə qədər olan nəticələr çox müsbətdir. Hansı vaksin Azərbaycana gəlsə, faydalı olacağını düşünürük. Amma daha spesifik açıqlamanı ÜST edəcək. Hazırda Azərbaycanda beynəlxalq vaksin planı hazırlanır. Biz də texniki dəstək veririk. Bir ekspertimiz çox yaxın vaxtda Azərbaycana gəlib bu məsələ ilə bağlı dəstəyini göstərəcək. Planlar hazırlanandan sonra açıqlana biləcək ki, hansı vaksindən nə qədər alınacaq, necə istifadə olunacaq”.