Bu ilin yanvar-mart ayları ərzində Dövlət Gömrük Komitəsinin (DGK) xətti ilə dövlət büdcəsinə 1 milyard 231 milyon 941,1 min manat daxil olub ki, bu da ötən ilin müvafiq dövrü ilə müqayisədə 30,5% çoxdur.
DGK-nın dərc etdiyi göstəricilərə görə, hesabat dövründə dövlət büdcəsinə daxil olan gömrük rüsumlarının həcmi ötən ilin analoji dövrü ilə müqayisədə 16% artaraq 302 milyon 536,6 min manat təşkil edib.
ƏDV üzrə daxilolmalar isə 39,4% artaraq 888 milyon 079,3 min manata bərabər olub. Aksizlər üzrə cari ilin ilk üç ayında daxilolmalar 18,2% azalaraq 29 milyon 190,2 min manat təşkil edib. Yol vergisi üzrə daxilolmaların həcmi 12 milyon 134,8 min manat təşkil edib ki, bu da ötən ilin analoji dövründə qeydə alınan göstəricidən 18,7% çoxdur.
Bu ilin mart ayında Komitəsinin xətti ilə dövlət büdcəsinə 411 milyon 103,7 min manat həcmində vergi və rüsumlar daxil olub ki, bu da 2021-ci ilin eyni ayı ilə müqayisədə 17,4% çox, bu ilin fevral ayı ilə müqayisədə isə 1,4% azdır.
Bu ilin mart ayı ərzində dövlət büdcəsinə daxil olan gömrük rüsumlarının həcmi ötən ilin analoji dövrü ilə müqayisədə 4,8% artaraq 106 milyon 824,0 min manat olub. Bu ilin fevral ayı ilə müqayisədə isə bu göstərici 5,2% artıb.
Həmçinin, cari ilin mart ayı ərzində ƏDV üzrə daxilolmalar ötən ilin eyni ayı ilə müqayisədə 26,7% artaraq 289 milyon 271,6 min manat (bu ilin fevral ayı ilə müqayisədə 3,9% az), aksizlər üzrə 27,2% azalaraq 11 milyon 259,9 min manat (fevral ilə müqayisədə 18% çox), yol vergisi üzrə daxilolmalar isə 15,8% azalaraq 3 milyon 748,0 min manat (fevral ilə müqayisədə 20,8% az) təşkil edib.