2022-ci ilin I rübündə “Azeri Light” (CIF) markalı neftin bir barelinin orta qiyməti 102,68 dollar təşkil edib.
Bu barədə SOCAR-ın vitse-prezidentinin müavini, mətbuat katibi İbrahim Əhmədov məlumat verib.
2021-ci ilin yanvar-mart aylarında “Azeri Light” markalı neftin bir barelinin orta qiyməti 61,6  dollar olub. Beləliklə, “Azeri Light” markalı neftin qiyməti ötən ilin müvafiq dövrü ilə müqayisədə 41,08 dollar və ya 1,7 dəfə artıb.
Azərbaycanın 2022-ci il dövlət büdcəsində bir barel neftin orta qiyməti 50 ABŞ dollarına bərabər götürülüb.
2021-ci ildə “Azeri Light” markalı neftin bir barelinin orta qiyməti 71,6 dollar (2020-ci ildə 43,7 dollar) təşkil edib.
Azərbaycan neftinin bir barelinin ən ucuz qiyməti 2020-ci il aprelin 21-də 15,81  dollarsəviyyəsində, ən yüksək qiyməti isə 2008-ci ilin iyulunda 149,66 dollar səviyyəsində qeydə alınıb.
“Azeri Light” markalı neft “Azəri-Çıraq-Günəşli” (AÇG) yataqlar blokunun işlənməsi haqqında müqavilə çərçivəsində hasil edilir. Müqavilədə SOCAR-ın payı 25% təşkil edir. Mənfəət nefti layihənin səhmdarları arasında müqavilədə iştirak payından asılı olaraq bölüşdürülür.
Azərbaycanda hasil edilən neftin 2/3 hissəsi AÇG-nin payına düşür.