Rusiya prezidenti Vladimir Putinin dost olmayan ölkələr üçün təbii qaz ödənişlərini rubla çevirmək qərarı Qərbi təəccübləndirib. Bu barədə Almaniyanın “Spiegel” qəzeti məlumat yayıb.
Putinin satılan qazın ödənişlərini rubl ilə qəbul etmək qərarı Qərbi təəccübləndirib, əslində Avropanı öz sanksiyalarını pozmağa məcbur edir. 
Sahibkartv.az xəbər verir ki, bu fikri Düsseldorfdan olan alman iqtisadçısı Yens Zudekum “Der Spiegel”ə istinadən bildirir

Zudekum əlavə edib ki, bu qərarı həyata keçirmək üçün avropalı tərəfdaşlar Avropa İttifaqının sanksiyaları altında olan Rusiya Federasiyası Mərkəzi Bankından rubl almalı olacaqlar.
Rusiya prezidenti Vladimir Putinin Rusiya qazının tədarükünə görə ödənişlərin avro və dollar ilə qəbul edilməyəcəyi barədə bəyanatı Avropada çaşqınlıq yaradıb. Belə ki, Avropa Komissiyasının rəhbəri Ursula fon der Leyen Avropa İttifaqının şirkətlərə Rusiya qazının pulunu rublla ödəməyə icazə verməyəcəyini bildirib. O, rubl ilə hesablaşmaların Rusiyaya qarşı tətbiq edilən sanksiyaların pozulması cəhdi olacağını vurğulayıb.
Fransa prezidenti Emmanuel Makron Rusiya qazının rublla ödənilməsi tələbinin müqavilələrin şərtlərinə cavab vermədiyini bildirib.
Valyuta eksperti Piter Bofinqer Rusiya prezidentinin bu addımının ilk növbədə rublun möhkəmlənməsinə yönəldiyi qənaətindədir.
“Əgər Qərbin qaz istehlakçıları rublu dollar və ya avro ödəyib almağa məcbur olsalar, Rusiya valyutasına tələbat artacaq və deməli onun məzənnəsi yüksələcəkdir”, - Bofinqer bildirib.
Kieldəki (Almaniyanın şimalı) Dünya İqtisadiyyatı İnstitutunun əməkdaşı Klaus-Yürgen Gernin fikrincə, Rusiya Federasiyasının Mərkəzi Bankı Rusiya bankları vasitəsilə qaz istehlakçılarına rubl sata, beləliklə, rublun məzənnəsini sabitləşdirə bilər. “Eyni zamanda, Putin Qərb dünyasına genişmiqyaslı təzyiq göstərəcək, çünki bu, onun öz sanksiyalarını absurd edəcək”, - Gern bildirib.