Konyalı iş adamları Azərbaycana investisiya qoymaqda maraqlıdırlar.
Bunu açıqlamasında Konyada səfərdə olan Müstəqil Sənayeçi və İş Adamları Dərnəyi (MÜSİAD) Azərbaycanın İdarə Heyətinin sədri Rəşad Cabirli bildirib.
O bildirib ki, Konyada səfərdə olan MÜSİAD Azərbaycan heyəti MÜSİAD Konya rəhbəri Mehmet Hilmi Kağnıcı ilə görüş keçirib.
R.Cabirli qeyd edib ki, görüş zamanı M.H.Kağnıcı MÜSİAD Konyanın 400-ə yaxın üzvü olduğunu bildirib.
“Görüş zamanı tərəflər arasında əməkdaşlığın artırılması və həyata keçirilə biləcək birgə layihələr ətrafında müzakirələr aparılıb və konyalı iş adamları Azərbaycana dəvət edilib”, - deyə R.Cabirli qeyd edib.
Onun sözlərinə görə, Azərbaycan və Türkiyədən olan iş adamlarının qarşılıqlı sərmayə qoymasına şərait yaratmaq, əməkdaşlığı gücləndirmək, Azərbaycanda investisiya imkanları və dəstək haqqında məlumat vermək, sahibkarları Azərbaycana dəvət etmək məqsədi ilə, MÜSİAD Azərbaycan heyəti Konya Ticarət Palatasının sədri Selçuk Öztürk ilə də görüş keçirib.
“Görüşdə S.Öztürkə Azərbaycanda münbit investisiya şəraitinin olması haqda məlumat verilib və eyni şəraitin Türkiyədə də olduğu bildirilib", - deyə R.Cabirli qeyd edib.
R.Cabirli deyib ki, Türkiyə Ticarət və Sənaye Palatasının (TOBB) məlumatına əsasən, keçən il Türkiyədə Azərbaycan sərmayəsi ilə 237 şirkət qurulub ki, bu da 2020-ci illə müqayisədə 89 şirkət çoxdur.
"2021-ci ildə qurulan şirkətlərin böyük əskəriyyəti, yəni 207-si İstanbulda fəaliyyət göstərir. Hesab edirəm ki, MÜSİAD Azərbaycanın fəaliyyəti ilə qarşılıqlı investisiya artımı olacaq”, -deyə o qeyd edib.
Qeyd edək ki, 8-12 mart tarixlərində Türkiyənin Konya şəhərində 18-ci kənd təsərrüfatı sərgisi keçirilir. Sərgidə MÜSİAD Azərbaycan heyəti və azərbaycanlı sahibkarlar da iştirak edir.
Xatırladaq ki, MÜSİAD-ın 81 ölkədə ümumilikdə 12 mindən çox üzvü, Türkiyədə isə 83 şöbəsi var.