ABŞ-da 1,5 trilyonluq xərclər paketi Nümayəndələr Palatasından sonra Senat tərəfindən təsdiqlənib. Paketə Ukraynaya 13,6 milyard dollar yardım da daxildir.
ABŞ-da Ukraynaya yardım paketini özündə əks etdirən və sentyabrın 30-na qədər hökumətə maliyyə ayrılmasını nəzərdə tutan 1,5 trilyon dollarlıq büdcə qanun layihəsi Senatda təsdiqlənib.
Sahibkartv.az xəbər verir ki, paket Senatda 31 əleyhinə 68 səs çoxluğu ilə qəbul edilib. Qanun layihəsi prezident Co Bayden tərəfindən imzalanmaq üçün təqdim olunacaq.
Senatdan keçən qanun layihəsi ABŞ-da daxili xərclərin ən böyük artımına imkan verəcək. Qanun layihəsi ilə müdafiə xərcləri istisna olmaqla, digər xərclər üçün 730 milyard dollar ayrılacaq. Beləliklə, bu xərc maddəsi üzrə 6,7 faiz artım olacaq.
Paketdə Pentaqonun illik xərcləri 743,4 milyard dollar olaraq nəzərdə tutulur. Bu maddə prezident Co Baydenin 715 milyard dollarlıq müdafiə xərcləri tələbini üstələyib.