Comex birjasının hərraclarında (CME Group-a daxildir) qızılın qiyməti 1,64% artaraq 1 troy unsiyası üçün 1902,2 dollara çatıb. Qızılın qiyməti sonuncu dəfə 11 iyun 2021-ci ildə bir troy unsiyası üçün 1900 dollar səviyyəsindən yuxarı olub.
Bakı vaxtı ilə saat 21:52-də qızılın qiyməti 1,6% bahalaşma ilə 1 troy unsiyası üçün 1899,1 dollar təşkil edib.
"Ukrayna ətrafında geosiyasi gərginlik və ABŞ-da yüksək inflyasiya səviyyəsi qızılın qiymətinin artmasına təsir edir", - analitiklər bildirirlər.
Həmçinin analitiklər bildirirlər ki, qızılın qiymətinin daha da artmasına ABŞ Federal Ehtiyat Sisteminin (FED) inflyasiya ilə mübarizə məqsədilə gözlənilən faiz artırması mane ola bilər. Nəticədə, sabit gəlirli aktivlər investorlar üçün daha cəlbedici olmalı, dollar isə “güclənməlidir”. Hər iki prosesin qızılın qiymətinə mənfi təsir göstərəcəyi gözlənilir.
“Əgər 2023-cü ilə nəzər salsaq, daha uzunmüddətli üfüqdən danışsaq, o zaman qlobal inflyasiya səbəbindən qızıl hasilatının artan maya dəyərinə diqqət yetirmək lazımdır. Bu, bu metalın qiymətini dəstəkləyə bilər”, - analitiklər qeyd edib.