2021-ci ildə Dövlət Neft Şirkəti tərəfindən qeyri-neft sektorunda əldə edilən nailiyyətlər ölkənin müvafiq sahədə ixrac əməliyyatlarına da əhəmiyyətli dəyər qatıb.
Sahibkartv.Az-ın məlumatına görə, ötən il ölkədə qeyri-neft məhsulları üzrə ümumi ixracın 26,4 faizi SOCAR-ın payına düşüb.
İl ərzində şirkət tərəfindən polimer məhsulları daxil olmaqla 712,2 milyon ABŞ dolları dəyərində qeyri-neft məhsulları ixrac edilib və bu, əvvəlki ilin müvafiq dövrü ilə müqayisədə 183 faiz çox olub.
Ötən il ərzində ölkənin qeyri-neft ixracı 870 milyon ABŞ dolları dəyərində artıb və qeyri-neft məhsulları üzrə ixrac artımının 64,4 faizi SOCAR tərəfindən qarşılanıb.
2021-ci ildə “SOCAR Polymer” müəssisəsi tərəfindən ümumilikdə 252,2 milyon ABŞ dolları dəyərində polimer məhsulu ixrac edilib. Bu, əvvəlki ilin müvafiq dövrü ilə müqayisədə 147 faiz çoxdur. Rəqəmlər onu göstərir ki, ötən il ölkə üzrə qeyri-neft ixracının 9,3 faizi, ixrac artımının isə 17,3 faizi “SOCAR Polymer”in payına düşüb.