İdxal, ixrac əməliyyatlarını həyata keçirən yük avtomobillərinin risk əsaslı avtomatlaşdırılmış sistem vasitəsilə keçidinin təmini üçün sərhəd risklərinin idarəolunması sisteminin modul layihəsi hazırlanıb, hazırda test olunaraq mərhələli tətbiq edilir.
Sahibkartv.az xəbər verir ki, bunu Dövlət Gömrük Komitəsinin (DGK) sədri Səfər Mehdiyev tviterdəki hesabında yazıb.

Sədr qeyd edib ki, idxal mallarına dair təqdim olunan gömrük bəyannamələri üzrə tətbiq ediləcək gömrük nəzarəti formasının seçilməsi məqsədilə risk ehtimalı yaradan göstəricilər üzrə avtomatlaşdırılmış “Bəyannamənin Risk Direktivi” layihəsi test edilmək üçün hazırdır.
"http://e.customs.gov.az portalında “Açıq məlumatlar” bölməsi  yaradılıb. Bu bölmə vasitəsilə müraciət formaları, daşıma şirkətləri üçün müvafiq məlumatların portala yüklənmə qaydaları, DGK-nin elektron sistemlərində istifadə olunan təsnifatlar əldə edilir", - Səfər Mehdiyev bildirib.
Dünən Səfər Mehdiyev bildirmişdi ki, ötən il ərzində risk göstəriciləri əsasında toplam 671 gömrük bəyannaməsi üzrə riskli əməliyyatlar aşkar edilərək nəticədə 10 milyon 653 min 684 manatın dövlət büdcəsinə ödənilməsi təmin olunub.