2020-ci ilin müvafiq dövrü ilə müqayisədə 2021-ci ilin yanvar-oktyabr aylarında əhalinin gəlirləri nominal ifadədə 2,4 faiz artaraq 47,3 milyard manat təşkil etmişdir.
“İkin məlumatlara görə, 2021-ci ilin yanvar-oktyabr aylarında ölkə əhalisinin nominal gəlirləri 47 milyard 259,8 milyon manat və ya hər nəfərə orta hesabla 4 min 718,8 manat təşkil etmişdir. Bütün icbari və könüllü ödənişlər edildikdən sonra əhalinin sərəncamında 42 milyard 394,6 milyon manatlıq vəsait qalmışdır”,- Dövlət Statistika Komitəsinin aylıq hesabatında bildirilir.
Qeyd edilib ki, 2021-ci ilin yanvar-sentyabr aylarında ölkə iqtisadiyyatında muzdla çalışan işçilərin orta aylıq nominal əməkhaqqı 2020-ci ilin müvafiq dövrünə nisbətən 2,3 faiz artaraq 723,2 manat təşkil etmişdir. Əməkhaqqı neft-qaz sektorunda 3183,2 manat, qeyri neft-qaz sektorunda 673,5 manat təşkil etmişdir. Dövlət müəssisələrində çalışan işçilərin əməkhaqları 641,4 manat, özəl müəssisələrdə isə 820,1 manat olmuşdur.
2021-ci ilin yanvar-oktyabr aylarında istehlak qiymətləri indeksi (inflyasiya göstəricisi) 2020-ci ilin müvafiq dövrü ilə müqayisədə 5,7 faiz, o cümlədən ərzaq məhsulları, içkilər və tütün məmulatları üzrə 6,7 faiz, qeyri-ərzaq malları üzrə 4,6 faiz, əhaliyə göstərilən ödənişli xidmətlər üzrə 5,0 faiz artıb.