İran Ermənistan üzərindən Gürcüstana yeni tranzit yolunun tikintisində iştirak etməyə hazırdır. 
Sahibkartv.az xəbər verir ki, bunu şənbə günü İranın Yollar və Şəhərsalma Nazirinin müavini Xeyrullah Xademi deyib.
“Ermənistan İrandan Gürcüstana yeni tranzit yolu yaratmağı planlaşdırır. Bu yolun tikintisində iştirak etməyə hazır olduğumuzu bildirmişik”, - İLNA agentliyi onun sözlərindən sitat gətirib. 
Nazir müavininin sözlərinə görə, "söhbət Gorus - Qafan yoluna yeni alternativ yoldan, başqa bir koridordan gedir."
O qeyd edib ki, bu gün İranın Şərqi Azərbaycan vilayətini İrəvanla birləşdirən bir marşrut var. "Bu yolun təxminən 21 kilometri Azərbaycanın bir hissəsi hesab olunur", - nazir müavini əlavə edib. Onun sözlərinə görə, "Azərbaycan tərəfi bir keçid məntəqəsinin olduğu bu qısa hissədən keçmək üçün ödəniş alır".
"Ən qısa zamanda alternativ bir marşrut yaratmaq lazımdır ki, yol artıq Azərbaycan ərazisindən keçməsin, bu da ermənilər üçün vacibdir və onların ehtiyaclarını ödəyir", - Xademi bildirib.