Bayden isə çarəsizdir: Respublikaçılar onun iqtisadi gündəmini alt-üst edib....

Dünyanın ən böyük iqtisadiyyatı olan ABŞ öz tarixində ilk dəfə defolt riskinə yaxındır.
Sahibkartv.az xəbər verir ki, çox şey bu həftə ərzində qanunverici orqanda -Konqresdəki səsvermələrdən asılıdır.
Konqresin Nümayəndələr Palatası bir neçə saat öncə hökumətin borclanmasına dair həddin götürülməsi üzrə qanun layihəsinin lehinə səs verib (219-un 212-ə səs çoxluğu ilə).Bu, ABŞ-ın öz maliyyə öhdəliklərini vaxtında yerinə yetirə bilməsi üçün 2022-ci ilin dekabrına qədər hər hansı yuxarı hədd olmadan əlavə borc cəlb etməsinə imkan verəcək.
Lakin, işin hələ yarısı tamamlanıb. Çünki sənəd daha sonra Konqresin digər palatasında - Senatda səsverməyə qoyulmalı və təsdiqləndikdən sonra imzalanmaq üçün prezident Baydenə təqdim edilməlidir. Hazırda Konqresin hər iki palatasında nisbi üstünlüyə malik iqtidardakı partiya -Demokratlar sənədi ən qısa zamanda Senatda da təsdiqlətdirmək niyyətindədirlər.Əzəli rəqibləri - Respublikaçılar ABŞ-ın artıq 28,4 trilyon dollara çatan borc yükünü daha da artırmağın əleyhinədir.
Xatırladaq ki, sentyabrın 21-də Nümayəndələr Palatası həm borc limitinin götürülməsi, həm də hökumətin fəaliyyətinin müvəqqəti maliyyələşdirilməsinə dair ümumi qanun layihəsini təsdiq etmiş, lakin Respublikaçılar sentyabrın 27-də sənədin Senatda qəbulunu bloklamışdılar.
Əgər Respublikaçılar bu dəfə də borc limitinin götürülməsi təklifini təsdiq etməsələr, bu zaman Demokratlar sadə səs çoxluğu üsulu ilə təkrar səsvermə keçirməlidir. Bu isə vaxtı uzada və həm ABŞ-ın maliyyə öhdəliklərinin yerinə yetirilməsini ləngidə, həm hökumətin maliyyələşdirilməsini dayandıra, həm də iş yerlərinin bağlanmasından tutmuş iri maliyyə-iqtisadi böhranına gətirib çıxara bilər. Maliyyə naziri Canet Yellen artıq son bir ayda dəfələrlə borc limitinin götürülməsinin vacibliyini vurğulayıb, əks təqdirdə defolt riskinin qaçılmaz olduğunu bildirib. Yellen son açıqlamasında xəzinədə pulun oktyabrın ortalarında tükənəcəyini qeyd edib.
ABŞ Konqresi 1960-cı ildən bəri 78 dəfə borc limitinin götürülməsinə dair qanun layihələri qəbul edib. Ən son belə hal 2019-cu ildə baş verib. Ən dramatik vəziyyətlərdən biri isə 2011-ci ildə yaranıb və Standard&Poors reytinq agentliyi tarixdə ilk dəfə ABŞ-ın kredit reytinqini aşağı salıb.
Baydeni qarşıdakı aylarda 2 daha ciddi sınaq gözləyir:1 trilyon dollarlıq infrastruktur investisiya proqramının və 3,5 trilyon dollar həcmində sosial dəstək paketinin təsdiqlənməsi. Hələlik bu mövzuda həm Respublikaçılar ciddi müqavimət göstərir, həm də Demokratların arasında ciddi fikir ayrılıqları var....