Avropada qaz fyuçerslərinin dəyəri 19,81% azalaraq 1000 kubmetr üçün 336,42 dollara düşüb. 
Bu barədə Sahibkartv.az ICE Futures birjasının məlumatlarına istinadən xəbər verir. 
Bloomberg yazır ki, Woodside Energy Group-a məxsus Avstraliyanın ən böyük LNG zavodunun işçilərinin tətil etməyəcəkləri fonunda qazın qiyməti aşağı düşüb. Həmkarlar ittifaqları şirkətdən aldıqları sərfəli təklifi nəzərdən keçirdiklərini bildiriblər. Mümkün razılaşmanın təfərrüatları həmkarlar ittifaqı üzvlərinin avqustun 24-də keçiriləcək iclasından sonra təqdim ediləcək.
Həmçinin Bloomberg qeyd edir ki, Woodside Energy Group-da mübahisə həll olunsa belə, tərəflər hələ də danışıqlar apardığı üçün Chevron-un Avstraliyadakı iki zavodunda tətil təhlükəsi qalmaqdadır. Problem həll olunmasa, ildə 24 milyon ton LNG (bu, dünya LNG istehsalının təxminən 5%-i) tədarükü risk altında olacaq.