Banklardan 6 ayda 563,3 milyon manat xalis mənfəət

2023-cü ilin yanvar-iyun aylarında banklar 563.3 milyon manat xalis mənfəət, 772.3 milyon manat məbləğində əməliyyat mənfəəti əldə etmişlər. Ötən ilin müvafiq dövrü ilə müqayisədə bankların xalis və əməliyyat mənfəəti müvafiq olaraq 41% və 26% artmışdır. 2023-cü ilin 6 ayında banklar tərəfindən 131.3 milyon manat məbləğində mənfəət vergisi ödənilmişdir.

Mərkəzi Bank 2023-cü ilin birinci yarısı üzrə bank sektorunun əsas göstəricilərini açıqlayıb.
Sahibkartv.az Mərkəzi Banka istinadən xəbər verir ki, 30 iyun 2023-cü il tarixinə fəaliyyətdə olan bankların cəmi aktivləri 45 milyard 218.3 milyon manat, cəmi öhdəlikləri 39 milyard 305.6 milyon manat, balans kapitalı 5 milyard 912.7 milyon manat olmuşdur.

İyun ayında bankların kredit portfeli 3.1% və ya 637 milyon manat artaraq 21 milyard 296.2 milyon manat olmuşdur.
Kredit portfelinin strukturu: ı) biznes kreditləri – 54.7% (11 milyard 650.5 milyon manat); ıı) istehlak kreditləri – 29.7% (6 milyard 324.7 milyon manat) və ııı) ipoteka kreditləri – 15.6% (3 milyard 321 milyard manat).
Cəmi kredit portfelində (BOKT-lər və kredit ittifaqları daxil olmaqla) vaxtı keçmiş kreditlərin payı əvvəlki ilin müvafiq dövrünə nəzərən 1.2 faiz bəndi azalaraq 2.3% təşkil etmişdir.
Öhdəliklərin strukturunda depozit portfeli üstünlük təşkil edir – cəmi öhdəliklərin 82%-i və ya 32 milyard 56.7 milyon manat. Depozit portfelinin 61.1%-i (19 milyard 584.2 milyon manat) hüquqi şəxslərin, 38.9%-i (12 milyard 472.5 milyon manat) fiziki şəxslərin depozitlərindən (fərdi sahibkarlıqla məşğul olan fiziki şəxslərin depozitləri istisna olmaqla) ibarətdir.
Hesabat ayında bankların əmanət portfeli 2.7% və ya 329.5 milyon manat artmışdır. Əmanət portfelinin 52.9%-i (6 milyard 595.5milyon manat) müddətli əmanətlərdən ibarətdir. Hüquqi şəxslərin tələbli depozitləri 16 milyard 105.9 milyon manat olmaqla, hüquqi şəxslərin cəmi depozit portfelinin 82.2%-ni təşkil etmişdir.
Fiziki şəxslərin əmanətlərinin dollarlaşması iyun ayında ilin əvvəlinə nəzərən 2.6 faiz bəndi, əvvəlki ilin müvafiq dövrünə nəzərən isə 3.6 faiz bəndi azalaraq 36.6% təşkil etmişdir.
2023-cü ilin yanvar-iyun aylarında banklar 563.3 milyon manat xalis mənfəət, 772.3 milyon manat məbləğində əməliyyat mənfəəti əldə etmişlər. Ötən ilin müvafiq dövrü ilə müqayisədə bankların xalis və əməliyyat mənfəəti müvafiq olaraq 41% və 26% artmışdır. 2023-cü ilin 6 ayında banklar tərəfindən 131.3 milyon manat məbləğində mənfəət vergisi ödənilmişdir.
30 iyun 2023-cü il tarixinə fəaliyyət göstərən 24 bankın filiallarının sayı 486, şöbələrinin sayı 86, ATM-lərin sayı 3009 olmuşdur. Hesabat ayında bank sektorunda çalışanların sayı 0.5% və ya 117 nəfər artaraq 23,241 nəfər təşkil etmişdir.

Tarix: 25-07-2023, 15:02 Oxunub: 36