ABB-nin gəlir və mənfəətində artım davam edir – İRİ BANK SON VƏZİYYƏTİNİ AÇIQLADI

"ABB" ASC (Azərbaycan Beynəlxalq Bankı) 2023-cü ilin ilk 6 ayını (yanvar-iyun) 164 milyon 38 min manat xalis mənfəətlə başa vurub. Bank ötən ilin eyni dövrünü 118 milyon 417 min manat xalis mənfəətlə bağlamışdı. Beləliklə, ABB-nin xalis mənfəəti 2023-cü ilin ilk 6 ayında ötən ilin ilk 6 ayı ilə müqayisədə 45 milyon 620 min manat və ya 38,5% artıb. Xalis mənfəətin artması əsasən faiz gəlirlərinin artmasından qaynaqlanır.
HƏM FAİZ, HƏM QEYRİ-FAİZ GƏLİRLƏRİ ARTIB
Sahibkartv.az xəbər verir ki, 2023-cü ilin birinci yarısında ABB-nin cəmi əməliyyat gəlirləri (faiz və qeyri-faiz gəlirləri)133 milyon 668 min manat və ya 39,8% artaraq 469 milyon 164 min manat təşkil edib. 2022-ci ilin birinci yarısında ABB-nin cəmi əməliyyat gəlirləri 335 milyon 496 min manat təşkil etmişdi.
2023-cü ilin birinci yarısında ABB-nin faiz gəlirləri 122 milyon 570 min manat artaraq 376 milyon 426 min manat, qeyri-faiz gəlirləri isə 11 milyon 98 min manat artaraq 92 milyon 738 min manata yüksəlib.
2023-cü ilin birinci yarısında ABB-nin cəmi əməliyyat xərcləri (faiz və qeyri-faiz xərcləri) 64 milyon 480 min manat və ya 39.9% artaraq 224 milyon 571 min manat təşkil edib. 2022-ci ilin birinci yarısında ABB-nin cəmi əməliyyat xərcləri 160 milyon 491 min manat təşkil etmişdi.
2023-cü ilin birinci yarısında ABB-nin faiz xərcləri 29 milyon 311 min manat artaraq 64 milyon 972 min manata, qeyri-faiz xərcləri isə 34 milyon 769 min manat artaraq 159 milyon 599 min manata yüksəlib.
ABB 2023-cü ilin birinci yarısını 244 milyon 593 min manat əməliyyat mənfəəti ilə bağlayıb. Bu, ötən ilin eyni dövrü ilə müqayisədə 69 milyon 588 min manat çoxdur. Bank ötən ilin eyni dövrünü 175 milyon 4 min manat əməliyyat mənfəəti ilə başa vurmuşdu.
ABB 2023-cü ilin birinci yarısında əməliyyat mənfəətindən mümkün zərərlər üçün yaradılan məqsədli ehtiyatlara 29 milyon 790 min manat ayırıb (2022-ci ilin eyni dövründə 35 milyon 372 min manat ayırmışdı). Həmçinin Bankın əməliyyat mənfəətindən 50 milyon 766 min manat mənfəət vergisi hesablanıb.
KREDİT PORTFELİ 4,2 MİLYARD MANATA YAXINLAŞIB
Cari ilin ilk 6 ayında ABB-nin kredit portfeli (müştərilərə verilmiş kreditlər) 657 milyon 354 min manat və ya 18,6% artaraq 4 milyard 187 milyon 936 min manata çatıb. Ötən ilin sonunda Bankın kredit portfeli 3 milyard 350 milyon 582 min manat təşkil etmişdi. O cümlədən, Bankın biznes kreditləri portfeli 343 milyon 338 min manat artaraq 1 milyard 981 milyon 275 min manata, ipoteka kreditləri portfeli isə 126 206 min manat artaraq 1 milyard 46 milyon 143 min manata yüksəlib.
30 iyun 2023-cü il tarixində ABB 11 milyard 749 milyon 456 min manat cəmi aktivlərə malik olub.
ƏHALİNİN DEPOZİTLƏRİ 112 MİLYON MANATDAN ÇOX ARTARAQ 2 MİLYARD MANATI KEÇİB
Cari ilin ilk 6 ayında ABB-də cəmi depozitlər 2 milyard 97 milyon 386 min manat və ya 19.75% azalaraq 8 milyard 524 milyon 966 min manata düşüb. O cümlədən, hüquqi şəxslərin depozitləri 2 milyard 209 milyon 485 min manat və ya 25,4% azalaraq 6 milyard 505 milyon 787 min manata düşüb, fiziki şəxslərin depozitləri isə 112 milyon 100 min manat və ya 5,9% artaraq 2 milyard 19 milyon 179 min manata çatıb.
MƏCMU KAPİTALI 1,6 MİLYARDA MANATA YAXINLAŞIB
30 iyun 2023-cü il tarixində ABB 1 milyard 568 milyon 317 min manat məcmu kapitala malik olub. Yarım il ərzində ABB-nin I dərəcəli kapitalının adekvatlıq əmsalı 19.39%, məcmu kapitalının adekvatlıq əmsalı 21.35% təşkil edib. Beləliklə, Bankın kapital adekvatlığı göstəriciləri tənzimləyici orqanın müəyyən etdiyi normalardan (müvafiq olaraq sistem əhəmiyyətli banklar üçün 6% və 12%) yüksək qalmaqdadır.
31 dekabr 2022-ci il tarixində ABB-nin məcmu kapitalı 1 milyard 385 milyon 105 min manat təşkil edirdi.
BANK SƏHMDARLARINA 156.6 MİLYON MANAT DİVİDEND ÖDƏYİR
Həmçinin qeyd edək ki, ABB ASC-nin Səhmdarlarının növbəti Ümumi Yığıncağının 03.07.2023-cü il tarixli qərarına əsasən, Bankın 2022-ci ildə əldə edilmiş mənfəətindən 156.6 milyon manat məbləğində vəsaitin Bankın səhmdarlarına dividend şəklində ödənilməsinə dair qərar qəbul edilib. Dividendin 150 milyon manatı dövlət büdcəsinə ödənilib.
1992-ci ildən fəaliyyət göstərən "ABB" ASC-nin nizamnamə kapitalının 96,59%-i dövlət müəssisələrinə məxsusdur.