Neft gəlirlərinin büdcə xərclərinin maliyyələşdirilməsində xüsusi çəkisinin azaldılması Dövlət Neft Fondunun (DNF) aktivlərinin tükənməsinin qarşısının alır. 
Sahibkartv.az xəbər verir ki, bu,  Hesablama Palatasının "2022-ci ilin dövlət büdcəsinin icrası haqqında" qanun layihəsinə və "2022-ci ilin dövlət büdcəsinin icrasına dair illik hesabata" verdiyi rəydə bildirilir.
Qeyd edilib ki, 2022-ci ildə dövlət büdcəsinin neft gəlirləri 15 milyard 329,6 milyon manat təşkil etmiş, 2021-ci ilə nisbətən 13,2% artmışdır. Cəmi məbləğdə artım izlənsə də, neft gəlirlərinin xüsusi çəkisi 1,3 faiz bəndi azalaraq 50%-ə enmişdir. 
Vergi orqanlarının xətti ilə toplanan neft daxilolmalarının proqnozla müqayisədə 3 milyard 386,6 milyon manat artıq icrası DNF transfertlərinin 3 milyard 594,5 milyon manat aşağı icrasına imkan yaratmışdır. DNF transfertinin məbləği əvvəlki illə müqayisədə 3 milyard 427 milyon  manat az olmuşdur.