İxracın və İnvestisiyaların Təşviqi Agentliyi (AZPROMO) Azərbaycanın sənaye məhsullarının ixracının genişləndirilməsini istəyir.
“Sahibkartv.az”ın Vilnüsə ezam olunan müxbiri xəbər verir ki, bunu Litvada səfərdə olan Agentliyin rəhbəri Yusif Abdullayev jurnalistlərə açıqlamasında bildirib.
"Azərbaycan ənənəvi olaraq kənd təsərrüfatı məhsulları ixrac edir. Biz böyük ixrac potensiallarının sənaye məhsulları üzrə reallaşdırılmasını istəyirik”, - deyə o qeyd edib.
Y. Abdullayev Azərbaycandan Litvaya gedən biznes nümayəndə heyəti ilə bağlı danışıb: “Nümayəndə heyəti kifayət qədər böyükdür. Dövlət şirkətlərindən - SOCAR, və "Azərbaycan Sənaye Korparasiyası" ASC-dən nümayəndələr burdadır".
Onun sözlərinə görə, bu gün Litvada keçirilən biznes forumda sənaye, əczaçılıq, kənd təsərrüfatı, supermarket şəbəkələrini təmsil edən sahibkarlar iştirak edirlər: "Biznes forumda iki ölkə arasında ticarət dövriyyəsinin artırılması istiqamətində məsələlər müzakirə olunacaq. Qarşılıqlı maraq doğuran layihələrin müzakirə olunacağına inanırıq”.
“Keçən ilin mayında Azərbaycan Prezidentinin iştirakı ilə keçirilən Biznes Forumunun çox yaxşı nəticələri olub. Bir sıra şirkətlərimizin məhsulları Litvaya ixrac olunmağa başlanıb. Litvadan isə alkoqollu içkilər idxal olunmağa başlanıb. Bu, çox praktik, məqsədli, fokuslu bir missiyadır və inanırıq ki, missiya uğurlu olacaq”,-deyə o bildirib.
AZPROMO rəhbəri qeyd edib ki, Azərbaycanın potensial investisiya layihələri kataloqu hazırlanıb: “Biz artıq bir neçə aydır ki, həmin kataloqu Litva tərəfinə göndərmişik. İşğaldan azad olunmuş ərazilərdə şərab zavodunun, su elektrik stansiyalarının qurulması həyata keçirilə bilər. Məqsədyönlü şəkildə çalışaraq ölkələrin müvafiq şirkətlərinin əməkdaşlığına nail ola bilərik”.
Xatırladaq ki, Azərbaycan Prezidenti İlham Əliyev və Litva Prezidenti Gitanas Nausedanın iştirakı ilə Vilnüsdə Azərbaycan-Litva biznes forumu keçirilir. Forumun yekununda 3 sazişin imzalanması gözlənilir.