"KOBİA-ya daxil olan müraciətləri araşdırdıqda görürük ki, ən çox maliyyə əlçatanlığı və alətlərinə çıxışla bağlı problemlər yaşanır".
Bunu "Sahibkartv.az"a açıqlamasında İqtisadiyyat Nazirliyi yanında Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov "Bank kreditlərinə çıxış çətinləşir" tviti ilə bağlı deyib.
O. Məmmədov qeyd edib ki, KOB subyektlərinin kənar maliyyələşmə mənbəyi kimi əsasən banklar çıxış edir və burada əsas narahatçılığı yüksək faizlər və sərt girov tələbləri doğurur: "Bununla yanaşı mikro və kiçik sahibkarlara banklar tərəfindən güzəştli kreditlərin verilməsinə marağın olmaması və sahibkarlara daxili öz kreditlərinin təklif olunması, eləcə də, çıxarışı olmayan torpaq sahələrinə güzəştli kreditlərin verilməməsi kimi hallarla əlaqəli müraciətlər daxil olmaqdadır".
KOBİA rəhbəri əlavə edib ki, kənd təsərrüfatı sahəsində fəaliyyət göstərən sahibkarlar tərəfindən güzəştli kreditlərin əldə edilməsi zamanı zaminlik və rəsmi gəlir çətinliyinin olması da problemlər sırasında yer alır: "Başqa bir çətinlik isə regionlarda olan girov təminatının əksər hallarda banklar tərəfindən qəbul edilməməsidir. Biz bu problemlə bağlı həm Mərkəzi Bankla, həm də Banklar Assosiyasiyası ilə aktiv iş aparırıq".