“Bu gün Sofiyada imzalanan anlaşma memorandumu Azərbaycan ilə neft-qaz sahəsində əməkdaşlıq baxımından yeni səhifə açır”.
"Sahibkartv.az"ın Sofiyaya ezam olunmuş müxbiri xəbər verir ki, bunu Slovakiyanın iqtisadiyyat naziri Karel Hirman “Bulgartransgaz” (Bolqarıstan), “Transgaz” (Rumıniya), FGSZ (Macarıstan), “Eustream” (Slovakiya) və Azərbaycan Dövlət Neft Şirkəti (SOCAR) arasında əməkdaşlığın təşviqi ilə bağlı Anlaşma Memorandumunun imzalanma mərasimində deyib.
K.Hirmanın sözlərinə görə, ötən il baş verən hadisələr Avropanın enerji təhlükəsizliyinə ciddi zərbə vurub və Rusiya qazından asılılığı üzə çıxarıb: “Bir qaz mənbəyindən asılılığın azaldılması bizim strategiyamıza uyğundur”.
Slovakiyanın iqtisadiyyat nazirinin sözlərinə görə, “Həmrəylik halqası” təşəbbüsü Avropanın enerji təhlükəsizliyini gücləndirməyə imkan verir.
"Hesab edirəm ki, bu gün imzalanan memorandum Azərbaycan ilə neft-qaz sahəsində əməkdaşlıq baxımından yeni səhifə açır. Azərbaycan bu sahədə mühüm və sınaqdan çıxmış tərəfdaşdır.
Memorandumu imzalamaqla biz Avropaya təbii qaz idxalı üçün yeni dəhliz yaratmağa, tərəfdaşımız Azərbaycan ilə əməkdaşlığa və qaz tədarükünün şaxələndirilməsinə dəstək verməyə hazır olduğumuza dair aydın siyasi siqnal verdik", - K.Hirman əlavə edib.
Onun sözlərinə görə, bu gün Sofiyada imzalanan memorandum Avropa regionuna qaz tədarükünün təhlükəsizliyinin yaxşılaşdırılmasına mühüm töhfə verəcək.
“Bu prosesə anlaşma memorandumunun imzalanması ilə başlamağımızdan məmnunam və inanıram ki, Avropa İttifaqı da bu layihəni müsbət qiymətləndirəcək, səylərimizə siyasi və maliyyə cəhətdən dəstək verəcək", - nazir bildirib.