Azərbaycan Mərkəzi Bankı (AMB) ölkədəki kommersiya banklarını 10-15 ailəlik kənddə ATM (bankomat) quraşdırmağa məcbur edə bilməz.
"Sahibkartv.az" xəbər verir ki, bunu "Azərbaycanda pul köçürmələrinin sosial-iqtisadi təsirlərinin gücləndirilməsi" layihəsi üzrə İşçi Qrupun analitiklərinin təklif və iradlarına cavab olaraq AMB-nin Milli ödəniş sistemlərinin inkişafı və nəzarət şöbəsinin nümayəndəsi Xəyalə Məmmədova bildirib.
"Azərbaycanda innovativ xidmətlərin əlçatanlığına paralel olaraq, əhali buna hazırlanmalıdır. Bankları 10-15 ailəlik kənddə ATM qurmağa məcbur etmək olmaz. Maliyyə sektoru çəkdiyi xərcin əvəzində nə qədər gəlir əldə edəcəyini hesablayır. Bank göstərdiyi xidmətdən gəlir götürə bilmirsə, AMB onun qarşısında tələb qoya bilməz. Çünki bu, rəqabətqabiliyyətli bazar mexanizminin yaradılmasına əngəl olur", - deyə o qeyd edib.
X.Məmmədovanın sözlərinə görə, innovativ xidmətlər elə təşkil olunmalıdır ki, xüsusilə ucqar bölgələrdə insanların maliyyə xidmətlərinə çıxışı olsun: "Bunun ən gözəl yollarından biri "fintech" şirkətlərinin maliyyə sektoruna cəlb edilməsidir. Bu xidmətlər o qədər düzgün təşkil edilməlidir ki, hər hansı risk yaşandığı zaman o riskin bədəlini əhali ödəməsin. Hələ də vətəndaşlarımızın əksəriyyəti düzgün formada rəqəmsal alətlərdən istifadə edə bilmir, bunun üçün bilik və bacarığı yetərli deyil. Biz özümüz müxtəlif regionlarda, təhsil müəssisələrində keçirilən təlimlərdə maraqlı suallarla rastlaşırıq. Vətəndaşlarımızın mobil tətbiqlərdən düzgün istifadə edə bilməməsi onların maliyyə itkiləri yaşamasına səbəb olur. Bizə daxil olan müraciətdə bildirilib ki, hər hansı bankın mobil tətbiqindən istifadə edən vətəndaş hər ay hesabından 10 manat çıxarılmasının səbəbini bilmir. Bu, bankın tutduğu xidmət haqqı deyil. Araşdırma ilə məlum oldu ki, vətəndaş hansısa saytda qeydiyyatdan keçdiyi zaman bank kartı ilə müəyyən xidmətə qoşulduğu üçün hər ay ondan 10 manat vəsait tutulur. Vətəndaş saytdan qeydiyyatdan keçdiyi zaman orada bildirilən şərtləri diqqətlə oxumadığı üçün bu cür əlavə xərclərlə üzləşir. Bunun kimi nümunələr çoxdur".