Türkiyə parlamenti təbii qaz qovşağı layihəsini həyata keçirmək üçün borularla nəqletmə operatoru olan BOTAŞ-ın strukturunda dəyişiklikləri təsdiqləyib.
“Sahibkartv.az” xəbər verir ki, bu barədə “Sabah” nəşri məlumat yayıb.
Bildirilib ki, Türkiyə Böyük Millət Məclisinin qəbul etdiyi qanun layihəsi özəl sektora təbii qaz idxalı üçün zəmin yaradacaq: “Türkiyəni enerji mərkəzinə çevirmək üçün BOTAŞ-ın strukturu dəyişdiriləcək".
Qeyd edilib ki, dəyişikliklərə əsasən, yeni bölmələr və şirkətlər yaradılacaq.
Bundan başqa, təbii qazın idxalı həm BOTAŞ, həm də özəl sektorda fəaliyyət göstərən hüquqi şəxslər üçün liberallaşdırılacaq. Lakin bu, mayeləşdirilmiş təbii qazın (LNG) və boru kəməri vasitəsilə nəql edilən spot qazının idxalına şamil edilməyəcək.
Xatırladaq ki, ötən ilin oktyabrında Rusiya Prezidenti Vladimir Putin və Türkiyə dövlət başçısı Rəcəb Tayyib Ərdoğan Türkiyədə təbii qaz qovşağının yaradılması barədə tapşırıq veriblər. V.Putin “Şimal axını” ilə itirilmiş tranzit həcminin yönləndirilə biləcəyi qovşağın yaradılması ideyası ilə Rusiya Enerji Həftəsi forumunda çıxış edib. Rusiya Baş nazirinin müavini Aleksandr Novak isə bildirmişdi ki, söhbət təkcə Türkiyədə ticarət platformasının yaradılmasından deyil, həm də cənub istiqamətində infrastrukturun inkişaf etdirilməsi və tədarükün artırılmasından gedir. Onun sözlərinə görə, burada başqa ölkələr də iştirak edə bilərlər.