Qazaxıstanın “KazMunayQaz” neft şirkəti "BP Azerbaijan" şirkətinin Ceyhandan neft yükləmələri ilə bağlı fors-major vəziyyət elan etməsindən sonra nəhəng Tengiz neft yatağından Bakı-Tbilisi-Ceyhan (BTC) boru kəməri ilə neft ixracının başlanmasını təxirə salıb.
Bu barədə “Sahibkartv.az” “Reuters”ə istinadən xəbər verir.
Qeyd edək ki, "KazMunayQaz” fevral ayından BTCt kəməri ilə neft ixracına başlamağı planlaşdırırdı. Şirkət fevralda 120 min ton həcmində neft tədarükünü planlaşdırırdı.
Bundan əvvəl isə “KazMunayQaz” şirkətindən BTC kəməri ilə illik 1,5 milyon ton neftin daşınması ilə bağlı Azərbaycan Dövlət Neft Şirkəti (SOCAR) ilə danışıqların aparıldığı qeyd edilmişdi.
“Reuters” qeyd edir ki, Türkiyənin Ceyhan limanından Azərbaycan xam neftinin ixracı zəlzələ nəticəsində dəyən ziyana görə hələ də dayandırılıb, lakin onun boru kəməri ilə terminala çatdırılması davam edir.
Zəlzələdən dörd gün sonra cümə günü rəsmi və sahənin mənbələri bildirib ki, Ceyhan neft terminalında hazırda zərərin qiymətləndirilməsi və təmir işləri aparılır və əlavə ediblər ki, heç bir problem aşkar edilməsə, BTC boru kəmərindən ixrac bazar günündən etibarən bərpa oluna bilər.
Qeyd edək ki, Qazaxıstan nefti Azərbaycanın xam malının əsas ixrac marşrutu olan BTC boru kəmərinə qarışıq şəkildə daxil olur. Marşrutun bir hissəsi dəmir yolu ilə, digər bir hissəsi isə Bakıya çatdırılmaq üçün Aktau limanında yüklənərək Xəzər dənizindən keçən kiçik tankerlərlə, sonradan boru kəmərinə doldurulur.
Qazaxıstan 2022-ci ilin yayında tədarükləri diversifikasiya etməyə çalışaraq, Rusiyadan yan keçərək neft ixracını artırmağa çalışır. Lakin hələlik Xəzər Boru Kəməri Konsorsiumu (CPC) əsas ixrac marşrutu olaraq qalır və Rusiyanın Novorossiysk yaxınlığındakı Yujnaya Ozereyevka dəniz terminalında başa çatır və alternativ təchizatın payı azdır.