"Azəristiliktəchizat" ASC 2022-2023-cü illər istilik mövsümünə hazırlıq tədbirləri çərçivəsində noyabrın 1-dən bu günə qədər 670 qazanxana əməliyyatçısını işə götürüb.
Bu barədə "Sahibkartv.az"a qurumdan bildirilib.
Məlumata görə, ümumilikdə cari mövsümdə 1 035 əməliyyatçının işə cəlb edilməsi nəzərdə tutulub. Ötən illərdə mövsümi olaraq çalışmış əməkdaşlarla yanaşı, bu il şirkətin rəsmi internet səhifəsi və sosial media hesablarında yerləşdilən iş elanı əsasında müraciət edən namizədlər də işə götürülüb.
Müsahibədən keçən əməkdaşlarla görüşlər keçirilir, onlara qazanxanalarda daxili nizam-intizam və texniki istismar qaydalarına əməl olunmasına dair müvafiq tapşırıqlar verilir.
2022-2023-cü illər istilik mövsümünə hazırlıq tədbirləri çərçivəsində qazanxana və istilik məntəqələrində çalışacaq əməliyyatçıların hazırlanması ilə əlaqədar “Azəristiliktəchizat”ın "Tədris Mərkəzi"ndə təlim kursları fəaliyyətə başlayıb. Təlim kurslarını Əməyin mühafizəsi, Təhlükəsizlik Texnikası, Yanğın Təhlükəsizliyi və Texniki İstismar qaydalarının tələbləri nəzərə alınmaqla təsdiq edilmiş tədris proqramına uyğun olaraq Cəmiyyətin yüksək ixtisaslı mütəxəssisləri aparır. Tədris iki növbəli təşkil edilib və 18 yaşdan yuxarı bütün kateqoriyalardan olan şəxslərin bu təlimlərdə iştirak hüququ var.