Azərbaycan Beynəlxalq Dəniz Təşkilatının Texniki əməkdaşlıq üzrə komitəsinin Böyük Britaniyanın paytaxtı Londonda keçirilmiş 72-ci sessiyasında təmsil olunub.
"Sahibkartv.az" bu barədə Rəqəmsal İnkişaf və Nəqliyyat Nazirliyinə istinadən xəbər verir.
Məlumata görə, ölkəmizi tədbirdə nazirlik yanında Dövlət Dəniz və Liman Agentliyinin (DDLA) nümayəndə heyəti - qurumun İdarə Heyəti sədrinin müavini Renat Rzayev, Gəmi qeydiyyatı və təsnifat cəmiyyətləri ilə iş departamentinin direktoru Seyidilyas Qədirov təmsil edib.
Nümayəndə heyəti Türkiyə, Malayziya, Gürcüstan və Səudiyyə Ərəbistanının nümayəndələri ilə görüşüb. İkitərəfli görüşlər zamanı dənizçilərə verilən sənədlərin qarşılıqlı tanınması, dövlət bayraq və dövlət liman nəzarəti sahəsində mövcud təcrübənin həyata keçirilməsi istiqamətlərində genişmiqyaslı müzakirələr aparılıb. Gələcəkdə bu səpkili görüşlərin mütəmadi olaraq keçirilməsi barədə razılıq əldə olunub.
Nümayəndə heyətinin BDT-nin Qərbi Asiya və Şərqi Avropa regionu üzrə meneceri İvalyo Valevlə də görüşü olub. Beynəlxalq təcrübənin öyrənilməsi və tətbiq olunması, gələcəkdə əməkdaşlar üçün təlimlərin keçirilməsi məsələləri müzakirə edilib.