"Azərbaycan Sənaye Korporasiyası" ASC-yə tabe olan “Azərpambıq Aqrar Sənaye Kompleksi” MMC 2021-ci ili 23 milyon 632 min manat xalis mənfəət ilə başa vurub. Halbuki, şirkət 2020-ci ili 1 milyon 44 min manat xalis mənfəət ilə bağlamışdı. Beləliklə, 2020-ci illə müqayisədə 2021-ci ildə “Azərpambıq Aqrar Sənaye Kompleksi”nin xalis mənfəəti 23 dəfəyə yaxın artıb. 
Sahibkartv.az MMC-nin maliyyə hesabatlarına istinadən xəbər verir ki, satışdan gəlirlər 2020-ci ildə 78 milyon 89 min manat ikən, 2021-ci ildə 168 milyon 697 min manata yüksəlib.


31 Dekabr 2021-ci il tarixində “Azərpambıq Aqrar Sənaye Kompleksi” MMC 205 milyon 37 min manat cəmi aktivlərə malik olub. Şirkət 2020-ci ilin sonunda 199 milyon 781 min manat cəmi aktivlərə malik idi.
“Azərpambıq ASK” MMC 2018-ci ildə yaradılmışdır. Cəmiyyət pambıq istehsalı, tədarükü, emalı və emaldan alınan məhsulların (pambıq mahlıcı, texniki çiyid, pambıq yağı, köməkçi məhsullar, çiyid cecəsi və s.) satışı ilə məşğul olur.  Cəmiyyətin  tərkibində 6 pambıq emalı zavodu (Şirvan, Saatlı, Ağcabədi, Beyləqan, Bərdə, Biləsuvar), 7 pambıq istehsalı və tədarükü məntəqəsi (Sabirabad, İmişli, Salyan, Ağdam, Tərtər, Goranboy, Ucar),  Biləsuvar rayonunda yerləşən Təcrübə-Sınaq Təsərrüfatı fəaliyyət göstərir. Şirvan Pambıq Emalı Zavodunda texniki çiyiddən yağ emal edən sex mövcuddur.