Avropa Komissiyasının məlumatına görə, avqustda avro zonasında orta inflyasiyanın səviyyəsi rekord səviyyəyə - 9,1%-ə çatıb.

Avropa Mərkəzi Bankı (AMB, ECB) inflyasiyanın pik həddinə çatmasının əsas səbəbi olan enerji bazarındakı şokla mübarizə apara bilməsə də, Avro zonasında inflyasiyanın indiki 9,1%-dən 2%-ə qaytarılması üçün lazım olan hər şeyi edəcək.
Sahibkartv.az xəbər verir ki, bu barədə cümə günü AMB-nin rəhbəri Kristin Laqard Avroqrupun Praqada keçirilən qeyri-rəsmi iclasında bildirib.
"Müxtəlif ölkələrdə inflyasiya 6% ilə 20% arasında dəyişir. Bizim əsas məqsədimiz inflyasiyanı 2%-ə endirmək olaraq qalır və ECB-nin İdarə Heyəti bunun üçün mümkün olan hər şeyi edəcək", - o deyib.
Bununla belə, Laqard qeyd edib ki, "inflyasiyanın sıçrayışının əsas səbəbi enerji bazarındakı şokdur və ECB burada çox az şey edə bilər, çünki bütün Aİ enerji bazarında struktur islahatları zəruridir".
Avropa Komissiyasının məlumatına görə, avqustda Avro zonasında inflyasiyanın səviyyəsi illik müqayisədə 9,1% rekord həddə çatıb. Avrozonada inflyasiya ilin əvvəlindən dayanmadan artır və mart ayından etibarən hər ay yeni mütləq rekord qeydə alınır.
Avropanın İqtisadi Məsələlər üzrə Komissarı Paolo Gentilona görə, zonada minimum iqtisadi artımın saxlanmasına baxmayaraq, avro zonası enerji böhranı və inflyasiyanın artması səbəbindən tənəzzül astanasındadır. 
Avroqrupun rəhbəri Paskal Donohue deyib ki, Aİ-nin enerji böhranına reaksiyası, onun fikrincə, istehlakçılara və biznesə əhəmiyyətli subsidiyaların ayrılmasını ehtiva etməlidir.
Praqada keçirilən mətbuat konfransının iştirakçıları Aİ-dəki enerji böhranına görə Rusiyanı günahlandırıblar.