Bu sözləri “Sahibkartv.az”a açıqlamasında Cəmiyyətin İdarə Heyətinin sədri Vüqar Oruc bildirib.
"Cəmiyyət inzibati müdaxilə səlahiyyətinə malik olmadığı üçün qiymətləndirmə sahəsində bəzi problemlərin həlli ləngiyir. Biz ancaq ictimai fikrə təsir göstərmək, tövsiyələr vermək, ayrı-ayrı dövlət qurumları ilə əlaqəli işləməklə addımlar atırıq. Bu istiqamətdə bir çox müsbət işlər görülüb. Baş Prokuror yanında Korrupsiyaya qarşı Baş mübarizə idarəsi ilə razılaşmamız var ki, onlara qiymətləndiricilərdən olan şikayətlərin araşdırılması üçün daxil olan müraciətlər bizə ünvanlansın. Biz isə bu müraciətləri müvafiq qurumlara yönəldək. Bu, bizim üçün dövlət qurumları ilə əməkdaşlıq baxımından son bir neçə ayda əldə etdiyimiz uğurlu təcrübədir. Dövlət Miqrasiya Xidməti ilə də müəyyən təmaslarımız olub. Xarici vətəndaşlar əmlak alan zaman bəzən qiymətləndirmə şirkətləri dəyəri 70-80 min manat olan əmlakın qiymətini 100 min manat göstərirlər. Biz razılıq əldə etmişik ki, AQC bu işdə şirkətlərin seçilməsində əsas rol oynasın. Kənd Təsərrüfatı Nazirliyi yanında Aqrar Kredit və İnkişaf Agentliyi ilə də görüş keçirmişik. Qurumun bəzi müvəkkil qiymətləndirmə şirkətləri işi uyğun metodologiya ilə aparmır. Onlarla danışmışıq ki, qiymətləndirmə proseslərində AQC-nin mövqeyi prioritet olsun. İpoteka və Kredit Zəmanət Fondu ilə isə razılaşmamız var ki, kredit veriləndə qiymətləndirmə aparan müvəkkil şirkətlər mütləq AQC-nin üzvü olsun. Bu gün Azərbaycanda fəaliyyət göstərən bankların çoxu qiymətləndirici seçimi ilə bağlı tenderlərdə AQC-nin üzvü olmağı əsas şərt kimi qoyur”, - deyə o, qeyd edib.
V.Orucun fikrincə, problemlərin həlli üçün Azərbaycanda Qiymətləndiricilər Palatası yaradılmalıdır: "Biz əlimizdən gələni edirik. Amma cəmiyyətimizin statusu imkan vermir ki, birbaşa inzibati tədbirlər görək. Hazırda əsas fəaliyyətimiz ona yönəlib ki, qiymətləndirmə fəaliyyəti haqqında yeni qanun qəbul edilsin və qiymətləndiricilər palatası təsis edilsin, bu palata Azərbaycanda fəaliyyət göstərən qiymətləndiricilərin fəaliyyətini inzibati metodlarla tənzimləmək imkanına malik olsun ki, təsadüfi şirkətlər, dempinq siyasəti aparan təşkilatlar qiymətləndirmə prosesindən kənarda qalsın. Nəticədə bazar öz-özünü tənzimləsin və şəffaflaşsın. Proseslər inzibati formada vahid bir mərkəzdən idarə edilsə, sertifikatı olmayan, sözügedən sahədə təcrübəsiz, beynəlxalq qiymətləndirmə standartlarından kənar işləyən, bu peşənin nəzəri əsaslarını dəqiqliklə mənimsəməyən şəxslərin, təşkilatların bazarı bağlanar.
Professional şirkətlər fəaliyyət üçün çox ciddi şəkildə maliyyə sərf edirlər. Professionallıq tələb edir ki, fəaliyyətə ciddi şəkildə maliyyə qoyulsun. Belə olduqda xidmət də bahalaşır. Amma dempinq siyasəti aparan bəzi təşkilatlar, ayrı-ayrı fərdlər bu şirkətlərdən dəfələrlə aşağı xidmət haqqı təklif edir, göstərdiyi xidmət isə normativlərə uyğun olmur. Bu da bizim hüquqlarımızın tapdalanmasıdır. Ölkədə vahid bir qurum olmalıdır ki, bu hüquqların tapdalanmasının qarşısını ala bilsin, professional bazarın formalaşması üçün şərait yaratsın və antidempinq siyasətinin aparılmasına başçılıq edə bilsin”.