Bu ilin I yarısında Azərbaycanda fəaliyyəti aktivləşmiş (bərpa edilmiş) hüquqi şəxslərin sayı ötən ilin eyni dövrü ilə müqayisədə 19,8 %, fəaliyyəti aktivləşmiş ƏDV ödəyicilərinin sayı isə 15,6 % artıb.
Bu barədə "Sahibkartv.az"a İqtisadiyyat Nazirliyi yanında Dövlət Vergi Xidmətindən bildirilib.
Məlumata görə, bu il iyulun 1-nə dövlət qeydiyyatında olan kommersiya hüquqi şəxslərin 89,3 %-i məhdud məsuliyyətli cəmiyyət (MMC), 1,4 %-i səhmdar cəmiyyət (SC), 1,2 %-i kooperativ və s. formalarda yaradılıb.
Hesabat dövründə yeni qeydiyyat üsulu ilə (fin kod+mobil nömrə) 946 yerli investisiyalı MMC (2021-ci ilin eyni dövrü ilə müqayisədə 64 vahid çox) qeydiyyata alınıb. Bu üsulun ümumi qeydiyyatda xüsusi çəkisi 12,4 %, yerli investisiyalı MMC-lərin qeydiyyatında isə 16,1 % təşkil edib.
Ümumiyyətlə, ilin əvvəlindən icra olunmuş elektron qeydiyyat ərizələrinin 4622-si və ya 83 %-i “Asan imza” ilə təqdim olunub.
İyunun sonuna qeydiyyatda olan publik hüquqi şəxslərin sayı 357 olub.