Rəqəmsal inkişaf və nəqliyyat naziri Rəşad Nəbiyev Azərbaycanda səfərdə olan Dəmir Yolu ilə Beynəlxalq Daşımalar üzrə Hökumətlərarası Təşkilatın (OTIF) Baş katibi Volfqanq Küpperlə görüşüb.
"Sahibkartv.az" xəbər verir ki, bu barədə nazir özünün "Twitter" hesabında yazıb.
"Azərbaycan-OTIF əməkdaşlığı, ölkəmizin nəqliyyat-tranzit imkanları və dəmir yolu sahəsində həyata keçirilən islahatlar müzakirə olundu. Qonağa Zəngəzur dəhlizinin bir hissəsi olan Horadiz – Ağbənd dəmir yolu xəttinin tikintisi ilə bağlı məlumat verildi, layihənin regional əhəmiyyəti vurğulanıb.
Eyni zamanda görüşdə beynəlxalq dəhlizlərin inkişafına yönəlmiş beynəlxalq layihələrdə iştirak və regional əməkdaşlığın gələcək perspektivləri ətrafında fikir mübadiləsi aparılıb", - R. Nəbiyev bildirib.
Sabah Baş katib Volfqanq Küpperin işğaldan azad edilmiş ərazilərə səfər etməsi, o cümlədən Horadiz – Ağbənd dəmir yolu xəttinin tikintisi ilə tanış olması nəzərdə tutulur.