2022-ci il aprelin 1-i vəziyyətinə ölkə üzrə 8168,8 min baş qoyun və keçi, 2666,9 min baş iribuynuzlu mal-qara, o cümlədən 1295,3 min baş inək və camış, 5952 baş donuz mövcud olmuşdur.İribuynuzlu mal-qaranın 48,6 faizini inək və camışlar təşkil edir.
Sahibkartv.az Dövlət Statistika Komitəsinin aylıq hesabatına istinadən xəbər verir ki, 2021-ci il aprelin 1-i ilə müqayisədə iribuynuzlu mal-qaranın sayı 6,1 min baş (0,2 faiz), inək və camışların sayı 8,4 min baş (0,7 faiz) artmış, qoyun və keçilərin sayı isə 110,4 min baş (1,3 faiz) azalmışdır.
Cari ilin yanvar-mart aylarında quşçuluq müəssisələrində diri çəkidə 19,8 min ton (keçən il 18,9 min ton) quş əti və 191,7 milyon ədəd (keçən il 183,6 milyon ədəd) yumurta istehsal olunmuşdur. Ümumilikdə bu müəssisələr üzrə cəmi quşların sayı 10 milyon 182,8 min baş olmuş, hər yumurtlayan toyuqdan orta hesabla 60 ədəd yumurta alınmışdır.
2022-ci ilin yanvar-mart aylarında diri çəkidə 134,3 min ton ət, 493,3 min ton süd, 476,6 milyon ədəd yumurta və 94,0 min ton tərəvəz istehsal olunmuşdur. 2021-ci ilin yanvar-mart ayları ilə müqayisədə ət istehsalı 3,0 faiz, süd istehsalı 1,9 faiz, yumurta istehsalı 2,8 faiz, tərəvəz istehsalı 16,9 faiz artmışdır.
2021-ci ilin birinci rübü ilə müqayisədə kənd təsərrüfatının ümumi məhsulu 3,4 faiz, o cümlədən heyvandarlıq məhsulları istehsalı 2,8 faiz, bitkiçilik məhsulları istehsalı 14,4 faiz artmışdır.