Mənzil İnşaatı Dövlət Agentliyinin növbəti layihəsi - Yasamal Yaşayış Kompleksinin ikinci mərhələsi üzrə mənzillərin güzəştlə satışına başlanılır.
Sahibkartv.az xəbər verir ki, ümumilikdə 442 mənzilin satışı 30 mart 2022-ci il tarixində saat 11:00-da başlayacaq, 8 aprel 2022-ci il tarixində saat 11:00-da başa çatacaqdır.
Studio mənzilin qiyməti 33 min 222 manatdan, 1 otaqlı mənzilin qiyməti 33 min 222 manatdan, 2 otaqlı mənzilin qiyməti 53 min 941 manatdan, 3 otaqlı mənzilin qiyməti 69 min 84 manatdan, 4 otaqlı mənzilin qiyməti isə 91 min 770 manatdan başlayır.
Mənzilləri güzəştli ipoteka krediti ilə də almaq mümkündür. 30 illik ipoteka zamanı aylıq ödəniş studio mənzil üzrə 143-145 manat, 1 otaqlı mənzil üzrə 143-145 manat, 2 otaqlı mənil üzrə 232 manat, 3 otaqlı mənzil üzrə 297-314 manat, 4 otaqlı mənzil üzrə 394 manat təşkil edir.
Qeyd edək ki, Azərbaycan Respublikası Prezidentinin 16 noyabr 2016-cı il tarixli 1113 nömrəli Fərmanına əsasən Mənzil İnşaatı Dövlət Agentliyinin sərəncamında olan mənzillərin əldə edilməsi “Elektron hökumət” portalı üzərində (www.e-gov.az) “Güzəştli mənzil” sistemi vasitəsilə elektron qaydada həyata keçirilir. 
Yalnız “Güzəştli mənzil” sistemində elektron kabinetə sahib olmuş vətəndaşlar mənzil almaq hüququna malikdir. Elektron kabinetə sahib olmuş bütün vətəndaşlar qeydiyyat tarixindən və sıra nömrəsindən asılı olmayaraq, mənzillərin seçimində bərabər hüquqa malikdir.
“Güzəştli mənzil” sistemindən istifadə qaydası ilə bağlı ətraflı məlumatla, o cümlədən mətn və video formatlı təlimatlarla www.mida.gov.az və www.mida.az internet saytlarının ana səhifələrində “Güzəştli mənzil sistemi” keçidi vasitəsilə tanış olmaq mümkündür.[video=]