“Son vaxtlar Azərbaycan bazarında apardığımız marketinq araşdırmaları nəticəsində məlum olub ki, ölkədə əllə toxunan xalçalara tələbat azalıb”.Bunu jurnalistlərə açıqlamasında “Azərxalça” ASC-nin mətbuat katibi Xatuna Abdullayeva bildirib.
“Buna görə də, “Azərxalça”nın istehsal etdiyi xalça və xalça məmulatlarının böyük əksəriyyətinin anbarda yığılıb-qalıb. Buna görə də, biz əlimizdəki məhsulları sürətlə emal edib bazara çıxarırıq, eləcə də modern üslubda xalça toxumağa başlamışıq. Müasir yerli və xarici bazar yüksək keyfiyyət tələb etdiyindən biz hazırda ona kəmiyyətdən daha çox diqqət ayırırıq. Yüksək keyfiyyətli xammal cəlb etməklə və istehsal prosesində texnoloji cəhətləri nəzarətə götürməklə məhsullarımızın keyfiyyətini artıracağımıza əminik.Araşdırma zamanı önümüzə çıxan məsələlərdən biri bazarın hazırda daha çox modern tərzdə və müasir interyerə uyğun xalçalara ehtiyacı olması faktı idi. Buna görə artıq “Azərxalça” yerli və xarici bazara yalnız klassik Azərbaycan xalçalarını deyil, modern tərzdə də xalçalar təqdim edir. Həmin xalçaların dizayn üslubu dəyişilsə də, naxış elementləri, toxunma texnikası olduğu kimi saxlanılır. Yəni ənənəvi naxışlarımız olduğu kimi saxlanılır, yalnız rəng və dizayn üslubu müasir bazara uyğunlaşdırılır. Artıq bir qism modern məhsullar bazara təqdim olunub və yeni xalçalarımıza duyulan maraq gözlənilən qədər çoxdur”, - deyə o, qeyd edib.
“Azərxalça” rəsmisinin sözlərinə görə, xalçaların keyfiyyətinin yüksəldilməsi üçün atılan addımlardan biri də müəssisədə yeni strukturun – keyfiyyətə nəzarət qrupunun formalaşdırılmasıdır: “Qrup birbaşa müəssisələrdə istehsal prosesində keyfiyyətə xəta yetirən hər hansı bir qüsurun yerindəcə aradan qaldırılması ilə yanaşı, hazır məhsul anbara daxil olmamışdan qabaq da istənilən xətanı görüb tədbirini görür. Keyfiyyətə nəzarət qrupu yüksək keyfiyyətli texnoloqlar, toxucu və ekspertlərdən ibarətdir. Texnoloqlar keyfiyyətə, iplərin dövriyyəyə buraxılmasına, xammalın hərəkətinə xüsusi diqqət yetirir. Bu proses izafi xammalın yerlərdə, anbarlarda toplanıb qalmasının da qarşısını alır. Bu mərhələdə işlər davam edir. Əvvəllki xalçalara nisbətdə hazırkılar daha keyfiyyətlidirlər. Biz qarşımıza məqsəd qoymuşuq ki, yüksək keyfiyyətli məhsulların ümumi payı 90%-i aşsın”