Azərbaycan Diasporuna Dəstək Fondunun təşkilatçılığı ilə keçirilən “Qardaşlaşmış Qarabağ Məktəbləri” layihəsi davam edir.
"SAHİBKARTV.AZ"un məlumatına görə, İsveçrədəki azərbaycanlıların mədəniyyət mərkəzinin rəhbəri və "Qarabağ Məktəbi"nin təsisçisi Qasım Nəsirov bildirib ki, məqsəd xaricdə yaşayan azərbaycanlı uşaqlar arasında əlaqələri təmin etməkdir:
"Gənclərin bir-birilərini tanınmalarını və dost qazanmalarını istəyirik. Həmçinin məhz belə addımlar nəticəsində Avropa qapıları yeniyetmələrimizin üzünə açılır. Eyni zamanda, İsveçrədə yaşayan uşaqlara dilimizi, mentalitetimizi öyrənmək imkanı yaradılır. Layihə böyük perspektivlər vəd edir. Ümid edirəm ki, gələcəkdə digər ölkələrdəki "Qarabağ məktəbləri" də oxşar addımlar atacaqlar. Beləliklə, Azərbaycanda yaşayan uşaqlarımızın dünyanın müxtəlif ölkələrindəki həmyaşıdları ilə tanış olmaq, daha geniş əhatəyə sahib olmaq imkanı yaranacaq. Yəni bu layihə azərbaycanlı uşaqların uğurlu gələcəyinə hesablanmış addımlardan biridir".
Fondun əməkdaşı Zeynəb Sabirli isə deyib ki, bu layihənin keçirilməsi barədə qərar 2019- cu ildə qəbul edilmişdi:
"Düşərgənin proqramında uşaqlara ana dili təlimlərinin keçirilməsi nəzərdə tutulub. Eyni zamanda biz istəyirik ki, bundan sonra düşərgə iştirakçıları arasında əlaqələr davam etsin. Məhz buna çalışırıq. Layihənin davamı İsveçrədə olacaq. Azərbaycanlı uşaqlar bu dəfə İsveçrəyə gedəcəklər".
Təlimin iştirakçılarından biri Qənbərli Şirin layihənin əhəmiyyətini yüksək qiymətləndirib. O söyləyib ki, bu təlimlər çox faydalıdır:
"Təlimlər nəticəsində həm əylənir, həm də dost qazanırıq. Müəllimlərimiz çox mehribandırlar. Təlimlər nəticəsində birgə əməyin, kollektiv səyin faydasını öyrəndim".
Qeyd edək ki, təlimlərdə məcburi köçkün və şəhid ailələrinin övladları iştirak edirlər. Məşğələlər Bakının Xəzər rayonunun Şüvəlan qəsəbəsində yerləşən “Cırtdan” Respublika Uşaq İstirahət və Sağlamlıq mərkəzində bir həftə ərzində səmərəli vaxt keçirilir. Şagirdlər mədəni-maarifləndirici panellərdə iştirak edirlər. Layihədə İsveçrədən 10 şagird və 2 təlimçi, yerli məktəblərdən 14 şagird və 2 təlimçi iştirak edir. Gənclər və İdman Nazirliyinin tərəfdaşı olduğu layihə iyulun 24-dək davam edəcək.