Twitter Inc. şirkəti, 2021-ci ilin ilk rübü üzrə investorları məyus edən reklam satış gəliri açıqlayıb.
Twitter-in yaydığı məlumata istinadən  şirkətin bu ilin ilk rübündəki gəlirləri keçən ilin eyni dövrü ilə müqayisədə 28% artaraq 1,04 milyard dollara yüksəlib. Şirkət, keçən ilin eyni dövründə 807,6 milyon dollar gəlir təmin etmişdi.
Şirkətin bu ilin ilk rübündə əldə etdiyi mənfəət isə 68 milyon dollar olub. Şirkət keçən ilin eyni dövründə 8,4 milyon dollarlıq zərər açıqlamışdı.
Şirkətin ilk rübdəki satış gəlirlərindəki 28%-lik artım, Facebook Inc. və Google kimi şirkətlərin rəqəmsal reklam gəlirlərindəki artım ilə müqayisədə aşağıdır.
Şirkətin açıqlamasına görə, ikinci rübdə satış gəlirinin 980 milyon dollar - 1,08 milyard dollar arasında reallaşacağı gözlənilir. Açıqlamanın ardından Twitter səhmləri 10%-dən çox ucuzlaşıb.
Twitterin bu ilin ilk rübündəki gündəlik orta hesabla aktiv istifadəçi sayı keçən ilin eyni dövrü ilə müqayisədə təxminən 20% artaraq 199 milyona çatıb.