Polşanın Baş naziri Donald Tusk "Financial Times" qəzetinə verdiyi müsahibədə Rusiyanın NATO ölkələrinə qarşı mümkün hərbi təcavüzü ilə bağlı dəhşətli xəbərdarlıq səsləndirib.

Tusk Alyansın şərq cinahı üçün təhlükənin artıq uzaq gələcəkdə deyil, çox qısa müddət ərzində reallaşa biləcəyini vurğulayıb. Polşa hökumət başçısının sözlərinə görə, təhdid olduqca ciddidir və söhbət illərdən deyil, yaxın aylardan gedir.

Müsahibə zamanı Tusk NATO və ABŞ-ın hücum vəziyyətində Avropanı müdafiə etmək öhdəliklərini real olaraq yerinə yetirməyə hazır olub-olmadıqlarını da şübhə altına alıb. O, NATO Nizamnaməsinin 5-ci maddəsinin hələ də qüvvədə olduğuna inanmaq istədiyini, lakin bəzən bu barədə ciddi suallarının yarandığını etiraf edib.

Baş nazir qeyd edib ki, Avropaya yalnız kağız üzərindəki təminatlar deyil, real hərbi qüvvələr, güclü loqistika və sərt cavab vermək hazırlığı lazımdır. Bu açıqlama Avropada təhlükəsizlik memarlığının gələcəyi ilə bağlı müzakirələri yenidən alovlandırıb və hərbi hazırlıqların artırılması zərurətini gündəmə gətirib.