Sahibkartv.az xəbər verir ki, Almaniya hökuməti 2025-ci ildən etibarən kənd təsərrüfatı sektorunda böyük dəyişiklik yaradacaq “AgroDigital Market” adlı rəqəmsal platformanı istifadəyə verib. Layihənin əsas məqsədi fermerlərin məhsullarını birbaşa alıcılara təqdim etməsi və vasitəçi şəbəkələrin aradan qaldırılmasıdır.

Bu platforma vasitəsilə fermerlər öz məhsullarını birbaşa bazara çıxaracaq, real vaxt rejimində satış edəcək, sifarişləri və ödənişləri rəqəmsal formada idarə edəcəklər. Fermerlər həm daxili, həm də beynəlxalq bazarlara çıxış əldə edərək qiymət siyasətini özü müəyyənləşdirəcək.

Almaniya Kənd Təsərrüfatı Nazirliyi bildirir ki, bu addım kiçik və orta fermer təsərrüfatlarının gəlirlərini artıracaq, məhsulların bazara çıxışını sürətləndirəcək və kənd təsərrüfatında rəqəmsal iqtisadiyyatı gücləndirəcək.

Platforma həmçinin müştərilərə birbaşa fermerlərlə əlaqə yaratmaq, keyfiyyətə nəzarət və ekoloji təmiz məhsulları seçmək imkanı verəcək. Mütəxəssislərin fikrincə, “AgroDigital Market” Almaniyada kənd təsərrüfatında yeni dövrün başlanğıcı olacaq və digər Avropa ölkələrinə də nümunə ola bilər.