Sahibkartv.az xəbər verir ki, Çin hökuməti 2025-ci ildən etibarən qədim Çin mədəniyyətini və zəngin kulinariya irsini dünyaya tanıtmaq məqsədilə Avropa və Asiyanın müxtəlif ölkələrində 10 yeni Çin Mədəniyyət Evi açır.

Layihə çərçivəsində Pekin ilk mərhələdə Paris, Berlin, Roma, Moskva, İstanbul, Tokyo, Seul, Bangkok, Dubai və Londonda mərkəzlərin yaradılmasını planlaşdırır. Bu mərkəzlərdə Çin ənənəvi musiqisi, rəqsləri, teatr sənəti, kaligrafiyası və keramika sənətinin nümayişləri keçiriləcək. Həmçinin, xüsusi kulinariya zonaları yaradılaraq qonaqlara Çin mətbəxinin nadir və ənənəvi yeməkləri təqdim ediləcək.

Çin Mədəniyyət Evində qonaqlar əyani şəkildə çay mərasimlərini izləyə, məşhur Peking ördəyi, Dim Sum və digər qədim Çin reseptləri ilə tanış ola biləcəklər. Eyni zamanda, bu mərkəzlər Çin dili kursları, mədəni seminarlar və sərgilər təşkil edəcək.

Rəsmi Pekin hesab edir ki, layihə Çinin “yumşaq güc” siyasətinin bir hissəsi olaraq, beynəlxalq arenada ölkənin mədəni nüfuzunu daha da artıracaq. Layihənin növbəti mərhələsində Afrikada da Çin Mədəniyyət Evlərinin açılması planlaşdırılır.