Sahibkartv.az xəbər verir ki, Afrika İttifaqı 2025-ci ildə qitənin ən böyük ekoloji və aqrar layihələrindən biri olan “Green Sahara” təşəbbüsünü rəsmi olaraq işə salıb. Layihənin əsas məqsədi texnologiya və süni suvarma sistemləri vasitəsilə minlərlə hektar səhralıq ərazini məhsuldar kənd təsərrüfatı sahəsinə çevirməkdir.

“Green Sahara” layihəsi çərçivəsində Afrikanın 7 ölkəsində - Çad, Niger, Mali, Sudan, Efiopiya, Mavritaniya və Liviya ərazilərində böyük suvarma kanalları və ağıllı su paylama sistemləri qurulur. Süni intellektlə idarə olunan bu sistemlər torpağın analizini aparır, optimal su miqdarını tənzimləyir və zəruri hallarda torpaq gübrələmə prosesini avtomatik həyata keçirir.

Afrika İttifaqının məlumatına görə, layihənin ilk mərhələsində 1 milyon hektar sahənin səhralıqdan çıxarılması və kənd təsərrüfatına qazandırılması planlaşdırılıb. Burada əsasən taxıl, qarğıdalı, pambıq və meyvə bağları salınacaq. Eyni zamanda, layihə regionda yeni iş yerlərinin yaradılması və milyonlarla afrikalının sosial rifahının yüksəldilməsi üçün də mühüm rol oynayacaq.

Ekspetlərin fikrincə, “Green Sahara” təkcə Afrika üçün deyil, bütün dünya üçün strateji əhəmiyyət daşıyır və gələcəkdə qlobal ərzaq təhlükəsizliyinə ciddi töhfə verəcək.